نوجوان لڑکی باپ کو ڈبے میں ڈال کر کوریئر کرنے پہنچ گئی

بنگلور: بھارت کے شہر بنگلور میں ایک ایسا عجیب و غریب واقعہ پیش آیا ہے جس نے دیکھنے والوں کو ورطہِ حیرت میں ڈال دیا۔ بھارتی میڈیا کے مطابق ایک نوجوان لڑکی ایک بڑے ڈبے کے ساتھ کوریئر آفس پہنچی اور اسے پارسل کرنے کی درخواست کی۔ تاہم، جب کوریئر عملے نے ڈبے میں غیر معمولی حرکت محسوس کی تو انہیں شک گزرا۔ شک کی بنیاد پر جب ڈبہ کھولا گیا تو اس میں سے ایک زندہ شخص برآمد ہوا، جسے دیکھ کر وہاں موجود لوگوں پر سکتہ طاری ہو گیا۔

کوریئر عملے نے فوری طور پر پولیس کو اطلاع دی، لیکن پولیس کے پہنچنے سے قبل ہی لڑکی اور وہ شخص وہاں سے فرار ہونے میں کامیاب ہو گئے۔ بعد ازاں، پولیس نے کارروائی کرتے ہوئے دونوں کو حراست میں لے کر تفتیش کی تو ایک دلچسپ حقیقت سامنے آئی۔ معلوم ہوا کہ یہ سب ایک ‘پرینک ویڈیو’ (Prank Video) کے لیے کیا گیا تھا۔

تفتیش کے دوران انہوں نے بتایا کہ اس ڈرامے کا مقصد تہواروں کے موقع پر بسوں کے مہنگے ٹکٹس اور ٹکٹ نہ ملنے جیسے مسائل کو اجاگر کرنا تھا۔ ان کا کہنا تھا کہ وہ دکھانا چاہتے تھے کہ ٹکٹ نہ ملنے کی صورت میں لوگ کس طرح کے متبادل اور خطرناک طریقے سوچ سکتے ہیں۔ پولیس نے پبلک پلیس پر خوف و ہراس پھیلانے کے الزام میں انہیں سخت وارننگ دے کر رہا کر دیا۔