کنوارے مرد و خواتین کو رہائش نہ دینا غیرقانونی اور غیرآئینی قرار

وفاقی محتسب سیکرٹریٹ برائے انسدادِ ہراسانی نے کنوارے مرد و خواتین کو رہائشی سہولت نہ دینے کو غیرقانونی، امتیازی اور آئین کے منافی قرار دے دیا ہے۔

یہ فیصلہ ایک خاتون درخواست گزار کی جانب سے نجی عمارت کی انتظامیہ کے خلاف دائر درخواست پر سنایا گیا، جس میں مؤقف اختیار کیا گیا تھا کہ تمام شرائط پوری کرنے کے باوجود صرف بیچلر ہونے کی بنیاد پر انہیں رہائش دینے سے انکار کیا گیا۔

فیصلے میں کہا گیا ہے کہ کوئی بھی کرایہ داری معاہدہ کنوارے افراد کو رہائش دینے سے نہیں روکتا اور اس نوعیت کی پابندیاں واضح طور پر امتیازی ہیں۔ محتسب کے مطابق کنوارا ہونا کسی فرد کو رہائش سے محروم کرنے کی کوئی قانونی وجہ نہیں بن سکتا۔

فیصلے میں مزید کہا گیا کہ ایسی پابندیاں مساوات، انسانی وقار اور رہائشی آزادی جیسے بنیادی آئینی اصولوں کی کھلی خلاف ورزی ہیں، اس لیے اس قسم کی تمام شرائط ابتدا ہی سے کالعدم تصور کی جائیں گی۔

وفاقی محتسب سیکرٹریٹ برائے انسدادِ ہراسانی نے یہ فیصلہ وفاقی و صوبائی حکام، رینٹ کنٹرولرز، ریگولیٹرز اور دیگر متعلقہ فریقین کو بھی ارسال کر دیا ہے تاکہ اس پر عملدرآمد یقینی بنایا جا سکے۔