بابر اعظم 2019ء کے بعد ڈومیسٹک فرسٹ کلاس کرکٹ میں ان ایکشن ہونگے

پاکستان کرکٹ بورڈ (پی سی بی) کی جانب سے ڈومیسٹک کرکٹ کو ترجیح دینے کی سخت ہدایات پر قومی کرکٹرز کا عمل جاری ہے۔ اس سلسلے میں پاکستان ٹیسٹ ٹیم کے کپتان بابر اعظم بھی طویل عرصے کے بعد ڈومیسٹک فرسٹ کلاس کرکٹ میں میدان میں اترنے کے لیے تیار ہیں۔ ذرائع کے مطابق بابر اعظم جاری ‘پریزیڈنٹ ٹرافی گریڈ ون فرسٹ کلاس’ کے دوسرے راؤنڈ میں آئل اینڈ گیس ڈیولپمنٹ کمپنی لمیٹڈ (OGDCL) کی نمائندگی کریں گے۔ بابر اعظم تقریباً 6 ڈومیسٹک سیزن کے بعد اس فارمیٹ میں واپسی کر رہے ہیں، انہوں نے آخری فرسٹ کلاس میچ دسمبر 2019ء میں سینٹرل پنجاب کی جانب سے کھیلا تھا۔

پاکستان میں جاری پریزیڈنٹ ٹرافی کا پہلا راؤنڈ ان دنوں اختتام پذیر ہو رہا ہے جبکہ دوسرا راؤنڈ 18 ستمبر سے شروع ہوگا۔ پی سی بی کی جانب سے ٹیسٹ اور قومی ٹیم کے تمام کھلاڑیوں کے لیے فرسٹ کلاس کرکٹ میں شرکت لازمی قرار دی گئی ہے۔ اسی پالیسی کے تحت فاسٹ باؤلر شاہین شاہ آفریدی بھی طویل وقفے کے بعد فرسٹ کلاس میچز کھیل رہے ہیں، جبکہ حارث رؤف، فخر زمان اور سلمان علی آغا سمیت دیگر نمایاں قومی کھلاڑی بھی مختلف ٹیموں کی نمائندگی کرتے ہوئے پریزیڈنٹ ٹرافی کے میدانوں میں متحرک ہیں۔