پاکستان کرکٹ کی خراب کارکردگی کا ذمہ دار کوچ یا کپتان کو نہیں ٹھہراؤں گا: اظہر علی

قومی کرکٹ ٹیم کے سابق کپتان اظہر علی نے کہا ہے کہ وہ حالیہ برسوں میں پاکستان کرکٹ ٹیم کی خراب کارکردگی کا ملبہ صرف کوچ یا کپتان پر ڈالنے کے حق میں نہیں ہیں۔

لاہور میں میڈیا سے گفتگو کرتے ہوئے اظہر علی نے کہا کہ ہم عموماً ناکامی کی تمام تر ذمہ داری کپتان اور کوچ پر ڈال کر آگے بڑھ جاتے ہیں، جبکہ حقیقت یہ ہے کہ پچھلے پانچ سالوں میں جن بنیادی چیزوں پر کام کرنے کی ضرورت تھی ان پر توجہ نہیں دی گئی، جس کی وجہ سے کارکردگی میں مسلسل گراوٹ آئی ہے۔

انہوں نے تجویز دی کہ ٹیم کی فوری بہتری کے لیے جو ضروری تبدیلیاں بنتی ہیں وہ ضرور کی جائیں، لیکن سب سے اہم مستقبل کی درست سمت میں منصوبہ بندی ہے۔ اگر ہم چار سے پانچ سال کا طویل المدتی پلان بنا کر کام کریں گے تبھی ہماری کرکٹ آگے بڑھ سکے گی۔

سابق کپتان نے ویسٹ انڈیز کے خلاف ٹیسٹ سیریز ڈرا ہونے کو ایک مثبت پہلو قرار دیتے ہوئے کہا کہ عبداللہ شفیق نے بہترین کم بیک کیا ہے، کیونکہ دباؤ میں واپس آنا آسان نہیں ہوتا۔ انہوں نے بابر اعظم کی فارم کی بھی تعریف کرتے ہوئے کہا کہ جس انداز میں وہ بیٹنگ کر رہے ہیں، ان میں پرانے بابر اعظم کی جھلک نظر آ رہی ہے۔

انگلینڈ کے آنے والے دورے سے متعلق اظہر علی کا کہنا تھا کہ پاکستان نے ماضی میں ہمیشہ انگلینڈ کی کنڈیشنز میں اچھی کرکٹ کھیلی ہے۔ اگرچہ یہ سیریز ایک بڑا چیلنج ثابت ہوگی، لیکن امید ہے کہ قومی ٹیم روایت برقرار رکھتے ہوئے شاندار کھیل پیش کرے گی