سابق کپتان اظہر علی کا بابراعظم کو کرکٹ سے بریک لینے کا مشورہ

لاہور: قومی کرکٹ ٹیم کے سابق کپتان اور مایہ ناز بلے باز اظہر علی نے سٹار بیٹر بابر اعظم کو مشورہ دیا ہے کہ وہ اپنی کارکردگی اور ذہنی تازگی کے لیے کم از کم 6 ماہ تک کرکٹ سے مکمل بریک لیں۔ ایک نجی ٹی وی کے عید سپیشل پروگرام میں گفتگو کرتے ہوئے اظہر علی نے شاہین شاہ آفریدی کو بھی مشورہ دیا کہ وہ اپنی فٹنس بہتر بنانے کے لیے دو سے تین ماہ کا وقفہ لیں۔

سابق کپتان سرفراز احمد کے حوالے سے بات کرتے ہوئے ان کا کہنا تھا کہ سرفراز کو اب کسی ایک جاب پر فوکس کرنا چاہیے۔ ایک سوال کے جواب میں اظہر علی نے بابر اعظم کی کپتانی کی حمایت کرتے ہوئے کہا کہ وہ شاہین آفریدی، سلمان علی آغا اور محمد رضوان کے مقابلے میں بہتر کپتان ہیں۔

ٹیم کے دیگر کھلاڑیوں کا موازنہ کرتے ہوئے اظہر علی نے دلچسپ تبصرہ کیا کہ اسکل (Skill) کے اعتبار سے نسیم شاہ، شاہین آفریدی سے بہتر باؤلر ہیں، جبکہ انہوں نے عمر گل کی یارکر کو بہترین قرار دیا۔ بھارتی کرکٹ پر بات کرتے ہوئے انہوں نے کپل دیو کو بھارت کا بہترین کپتان قرار دیا۔ مستقبل کے حوالے سے اظہر علی نے اپنی خواہش کا اظہار کرتے ہوئے کہا کہ اگر موقع ملا تو وہ کوچنگ کے شعبے میں آنا پسند کریں گے۔