ذہین گائے نے اوزاروں کا استعمال کرکے سائنسدانوں کو حیران کردیا

آسٹریا کی ایک گائے ’’ویرونیکا‘‘ نے دنیا بھر میں توجہ حاصل کر لی ہے، جسے انسانی تاریخ میں پہلی ایسی گائے قرار دیا جا رہا ہے جو باقاعدہ طور پر اوزار استعمال کرتی ہے۔

سوشل میڈیا پر وائرل ویڈیو میں ویرونیکا کو لکڑی، جھاڑو اور ریک جیسے اوزار اپنے جسم کو کھجانے کے لیے استعمال کرتے دیکھا گیا، جس کے بعد ماہرین نے مویشیوں کی ذہانت پر ازسرنو غور شروع کر دیا ہے۔

ویانا کی یونیورسٹی آف ویٹرنری میڈیسن کے محققین کی جانب سے سائنسی جریدے کرنٹ بایولوجی میں شائع ہونے والی تحقیق کے مطابق ویرونیکا کا یہ عمل باقاعدہ ’’ٹول یوز‘‘ کی واضح مثال ہے، جو اب تک مویشیوں میں ریکارڈ نہیں کی گئی تھی۔

ماہرین کے مطابق تقریباً 10 ہزار سال سے انسان کے ساتھ رہنے والے مویشیوں میں اس سطح کی ذہانت پہلی بار سامنے آئی ہے۔ تحقیق میں بتایا گیا کہ ویرونیکا ضرورت کے مطابق جھاڑو کے مختلف حصے استعمال کرتی ہے، جسے ’’ملٹی پرپز ٹول یوز‘‘ کہا جاتا ہے، جو غیر بندر نما جانوروں میں نہایت نایاب ہے۔

سائنسدانوں نے یہ بھی مشاہدہ کیا کہ اگر اوزار غلط زاویے پر ہو تو ویرونیکا پہلے زبان سے اسے درست کرتی اور پھر دانتوں کی مدد سے استعمال کرتی ہے۔ سات مختلف تجرباتی سیشنز میں اسے 76 مرتبہ اوزار استعمال کرتے دیکھا گیا۔

ویرونیکا کے مالک، کیرنتھیا سے تعلق رکھنے والے نامیاتی کسان بیکر وٹگر ویگیلے کے مطابق یہ عادت وقت کے ساتھ پروان چڑھی۔ ان کا کہنا ہے کہ گائے نے پہلے لکڑی کے ٹکڑوں سے کھیلنا شروع کیا اور پھر آہستہ آہستہ انہیں جسم کھجانے کے لیے استعمال کرنا سیکھ لیا، جو اس کی غیر معمولی ذہانت کا ثبوت ہے۔