بلند آواز میں چیخنے کا ریکارڈ آسٹریلوی شہری کے نام

کینبرا: آسٹریلیا سے تعلق رکھنے والے ایک ٹاؤن کرائر (ٹاؤن کونسل کے سرکاری اناؤنسر) نے اپنی گرجدار اور انتہائی طاقتور آواز کے بل بوتے پر گینیز ورلڈ ریکارڈز میں اپنا نام درج کروا لیا ہے۔ انہوں نے 122.4 ڈیسیبلز (Decibels) کی ریکارڈ توڑ سطح پر چیخ کر یہ اعزاز اپنے نام کیا۔ ‘لارڈ جوزف’ کے نام سے معروف، کینبیرا اور گوئنبیان کے سرکاری ٹاؤن کرائر جوزف مک گریل-بیٹ اپ نے میڈیا کو بتایا کہ ان کی آواز ہمیشہ سے اتنی جاندار نہیں تھی، بلکہ بچپن میں وہ انتہائی شرمیلے تھے اور کبھی دوسروں کے سامنے کھل کر نہیں بولتے تھے۔

جوزف کے مطابق، اسکول کی تعلیم مکمل کرنے کے بعد جب انہوں نے تھیٹر جوائن کیا تو انہیں مائیکروفون کے بغیر پرفارم کرنے کے لیے اپنی آواز کو بلند کرنے کی ضرورت محسوس ہوئی۔ تھیٹر کی باقاعدہ تربیت نے ان کے بولنے کے انداز کو بدلا اور وقت کے ساتھ ساتھ ان کی آواز مزید طاقتور ہوتی گئی۔ جوزف کو 2017ء میں باقاعدہ طور پر ٹاؤن کرائر مقرر کیا گیا، جس کے بعد 2022ء میں انہوں نے ‘اینشئنٹ اینڈ آنرایبل گلڈ آف آسٹریلین ٹاؤن کرائرز’ کے مقابلوں میں حصہ لینا شروع کیا۔ ابتدا میں چند پوزیشنز جیتنے کے بعد، انہوں نے 2024ء کے مقابلے میں 98 ڈیسیبل کی للکار کے ساتھ پہلی پوزیشن حاصل کی، جو اب ابھرتے ہوئے 122.4 ڈیسیبلز کے ساتھ ایک عالمی ریکارڈ کی شکل اختیار کر چکی ہے۔