بھارت میں مصنوعی وقار کی سیاست سنگین سوالات کو جنم دے رہی ہے: عطا تارڑ

وفاقی وزیر اطلاعات و نشریات عطا اللہ تارڑ نے بھارتی وزیرِ اعظم نریندر مودی کو ملنے والے غیر ملکی اعزازات پر تنقید کرتے ہوئے کہا ہے کہ بھارت میں مصنوعی وقار کی سیاست اب سنگین سوالات کو جنم دے رہی ہے۔

سماجی رابطے کی ویب سائٹ ’ایکس‘ (سابقہ ٹویٹر) پر جاری اپنے ایک بیان میں عطا تارڑ کا کہنا تھا کہ کسی بھی غیر ملکی دورے سے محض چند روز قبل اعزازات کا تخلیق کیا جانا ایک بڑا سوالیہ نشان ہے۔ انہوں نے مزید کہا کہ ان اعزازی اسناد میں املا (Spellings) کی فاش غلطیاں بھی سامنے آئی ہیں جو کہ شدید شرمندگی کا باعث بن رہی ہیں۔

وفاقی وزیر اطلاعات نے مودی کے ایوارڈز پر طنز کرتے ہوئے کہا کہ کسی ایک ہی شخصیت کا کسی اعزاز کو حاصل کرنے والا دنیا کا پہلا اور واحد فرد بن جانا دراصل عالمی سطح پر کی جانے والی ‘امیج مینجمنٹ’ (شخصی تشہیر) کی ناکامی کو ظاہر کرتا ہے۔

عطا تارڑ نے دعویٰ کیا کہ بھارتی حکومت برسوں سے ایسے مصنوعی اعزازات کو اپنی عالمی پذیرائی کا ثبوت بنا کر پیش کرتی رہی ہے، اور وہاں کی حکومت کی نفرت پر مبنی پالیسیوں کے باوجود ان بیرونِ ملک اعزازات کی بڑے پیمانے پر تشہیر کی گئی۔

ان کا مزید کہنا تھا کہ ایک طرف نریندر مودی بیرون ملک جا کر ایسی اعزازی تقاریب میں شریک ہو رہے ہیں، جبکہ دوسری طرف عام بھارتی عوام اندرونِ ملک سنگین اور بنیادی مسائل کا سامنا کر رہے ہیں۔