ایشن گیمز: پاکستان ہاکی ٹیم کا ایونٹ میں شاندار آغاز، تھائی لینڈ کو 9-0 سے ہرادیا

جاپان کے شہر ایچی نوگویا میں جاری ‘ایشین گیمز 2026’ کے ہاکی مقابلوں میں پاکستان ہاکی ٹیم نے شاندار اور فاتحانہ آغاز کرتے ہوئے اپنے پہلے میچ میں تھائی لینڈ کو 0-9 کے بھاری مارجن سے شکست دے دی ہے۔ گروپ بی کے اس ایک طرفہ مقابلے میں قومی کھلاڑیوں نے میچ کے آغاز سے ہی جارحانہ انداز اپنایا اور تھائی لینڈ کی دفاعی لائن کو بے بس کرتے ہوئے مسلسل 9 گول داغے، جبکہ حریف ٹیم میچ میں کوئی بھی گول اسکور کرنے میں ناکام رہی۔

اس شاندار کامیابی کے ساتھ پاکستان نے گروپ بی میں اپنی پیش قدمی مضبوط کر لی ہے۔ گروپ بی میں پاکستان کے ساتھ ملائیشیا، چین، عمان، ازبکستان اور تھائی لینڈ کی ٹیمیں شامل ہیں۔ پاکستانی ٹیم ایونٹ میں اپنا اگلا میچ 22 ستمبر کو ازبکستان کے خلاف کھیلے گی، جس کے بعد قومی ٹیم 24 ستمبر کو چین، 26 ستمبر کو ملائیشیا اور 28 ستمبر کو عمان کے مدمقابل آئے گی۔ جاپان میں جاری ان مقابلوں میں پاکستان کی نظریں گروپ مرحلے میں مسلسل فتح برقرار رکھ کر اگلے مرحلے تک رسائی پر مرکوز ہیں۔