آرٹیفیشل چیٹ بوٹ نے مودی کو احمق اور جاہل قرار دیدیا

سوشل میڈیا پر ایک واقعہ اس وقت خاصی توجہ حاصل کر رہا ہے جس میں ایکس (سابقہ ٹوئٹر) کے اے آئی چیٹ بوٹ گروک کے جواب کو صارفین نے متنازع قرار دیا ہے۔ آرٹیفیشل انٹیلیجنس کی تیزی سے بڑھتی مقبولیت جہاں لوگوں کو حیران کر رہی ہے وہیں اس کے بعض جوابات دلچسپ مگر بحث انگیز بھی ثابت ہو رہے ہیں۔

تفصیلات کے مطابق ایک سوشل میڈیا صارف نے گروک کو ایک تصویر فراہم کی جس میں بھارتی وزیرِ اعظم نریندر مودی، کانگریس رہنما راہول گاندھی اور لوک سبھا کے اسپیکر موجود تھے۔ صارف نے گروک کو ٹیگ کرتے ہوئے ہدایت دی کہ تصویر میں سے “احمق شخص” کو ہٹا کر نئی تصویر بنا دی جائے، تاہم اس نے کسی بھی رہنما کا نام نہیں لیا۔

سوشل میڈیا پر وائرل دعوؤں کے مطابق گروک نے جواب میں نئی تصویر تیار کی جس میں نریندر مودی کو ہٹا دیا گیا۔ صارف نے یہ تصویر شیئر کرتے ہوئے دعویٰ کیا کہ چیٹ بوٹ نے تینوں میں سے بھارتی وزیرِ اعظم کو “احمق” قرار دے کر تصویر سے نکال دیا۔

اس مبینہ عمل کے بعد سوشل میڈیا پر شدید ردِعمل دیکھنے میں آیا۔ بعض صارفین نے اسے طنزیہ اور دلچسپ واقعہ قرار دیا، جبکہ نریندر مودی کے حامیوں نے گروک اور ایکس انتظامیہ پر جانبداری اور توہین آمیز رویے کا الزام عائد کیا۔

ماہرین کے مطابق چیٹ بوٹس کے جوابات عموماً انٹرنیٹ پر دستیاب ڈیٹا اور عوامی بیانیے کی بنیاد پر تشکیل پاتے ہیں، تاہم ایسے حساس معاملات میں اے آئی کے نتائج کو حتمی رائے سمجھنا درست نہیں۔ واقعے نے ایک بار پھر آرٹیفیشل انٹیلیجنس کے غیر جانبدار ہونے اور اس کے استعمال سے جڑی اخلاقی بحث کو تازہ کر دیا ہے۔