میری موسیقی غیر انسانی کام کیلئے استعمال نہ کریں: آریانا کی وائٹ ہاؤس کو تنبیہ

واشنگٹن: مشہورِ زمانہ امریکی پاپ اسٹار اور مایہ ناز اداکارہ آریانا گرانڈے نے صدر ڈونلڈ ٹرمپ کی انتظامیہ کو سخت ترین الفاظ میں تنبیہ کرتے ہوئے مطالبہ کیا ہے کہ وہ اپنی حکومتی پالیسیوں کی تشہیر کے لیے ان کی موسیقی کا استعمال فوری طور پر بند کرے۔ اس معاملے پر وائٹ ہاؤس اور نامور گلوکارہ کے درمیان سوشل میڈیا پر شدید لفظی جنگ چھڑ گئی ہے۔ یہ تنازع اس وقت شروع ہوا جب وائٹ ہاؤس کی میڈیا ٹیم نے سوشل میڈیا پلیٹ فارم ٹک ٹاک (TikTok) پر ایک ویڈیو شیئر کی۔ اس ویڈیو میں حکومت کی سخت ترین امیگریشن (تارکینِ وطن) پالیسی کو دکھایا گیا تھا، جہاں سرکاری اہلکار غیر قانونی تارکینِ وطن کو گرفتار کر کے ہتھکڑیاں لگا رہے تھے اور پسِ منظر (Background) میں آریانا گرانڈے کا سال 2024ء کا سپر ہٹ گانا ’’بائے‘‘ (Bye) چل رہا تھا۔

اس ویڈیو پر شدید برہمی کا اظہار کرتے ہوئے آریانا گرانڈے نے وائٹ ہاؤس کی پوسٹ پر براہِ راست کمنٹ کیا:

“براہ کرم میری موسیقی کو کبھی بھی اس وحشیانہ، غیر انسانی اور گھناؤنے بکواس کام کے لیے استعمال نہ کریں”۔

گلوکارہ کے قریبی ذرائع کے مطابق، ان کی قانونی ٹیم اب ان تمام پہلوؤں اور اقدامات پر غور کر رہی ہے جن کے ذریعے وائٹ ہاؤس کی اس ویڈیو سے ان کا گانا قانونی چارہ جوئی کے ذریعے جلد از جلد ہٹوایا جا سکے۔ وائٹ ہاؤس کی ترجمان ایبی گیل جیکسن نے پاپ اسٹار کے اس کمنٹ کا ترکی بہ ترکی جواب دیتے ہوئے کہا: “ہم یہ بات آخری بار واضح کر رہے ہیں کہ اصل میں وحشیانہ، غیر انسانی اور گھناؤنے وہ مجرم غیر قانونی تارکینِ وطن ہیں جنہوں نے بے قصور امریکی شہریوں کو شدید زخمی کیا اور ان کا بے رحمی سے قتل کیا۔ حکومت کی اولین ترجیح ملکی سلامتی اور قانون پر سختی سے عمل درآمد کو یقینی بنانا ہے”۔