اینٹارکٹیکا کا بیکٹیریا کینسر کے علاج میں انقلاب برپا کر سکتا ہے: تحقیق

واشنگٹن: سائنس دانوں نے انکشاف کیا ہے کہ اینٹارکٹیکا کے انتہائی سرد اور برفیلے سمندری پانیوں میں رہنے والی ایک خاص قسم کے بیکٹیریا میں مستقبل کے کینسر (خصوصاً جلد کے کینسر ‘میلینوما’) کے علاج کے اہم راز چھپے ہو سکتے ہیں۔ محققین نے دریافت کیا ہے کہ یہ میلانوما کینسر کو ختم کرنے والا بیکٹیریا سمندری جانداروں ‘ایسیڈینز’ (Ascidians) پر نشوونما پا رہا تھا، جنہیں عام زبان میں ‘سی اسکوئرٹس’ بھی کہا جاتا ہے۔ یہ حیران کن دریافت دنیا کے انتہائی دور افتادہ اور دشوار گزار خطے میں کی جانے والی چھ ہفتوں پر مشتمل ایک طویل سائنسی مہم کے دوران عمل میں آئی۔

یونیورسٹی آف ساؤتھ فلوریڈا میں کیمسٹری کے پروفیسر بِل بیکر نے اس کامیابی کے حوالے سے بتایا کہ ہماری ٹیم نے سب سے پہلے یہ معلوم کیا کہ یہ سمندری جاندار ایک ایسے خاص بیکٹیریا کی میزبانی کرتا ہے جس میں ایک قدرتی زہریلا مرکب موجود ہے۔ یہ مرکب حیرت انگیز طور پر صرف میلینوما کینسر کے خلیات (Cells) کو ہلاک کرتا ہے، جبکہ عام اور صحت مند انسانی خلیات کو کوئی نقصان نہیں پہنچاتا۔ انہوں نے مزید وضاحت کی کہ کینسر کی نئی دواؤں کی تیاری میں یہی خصوصیت سب سے زیادہ اہم اور انقلابی تصور کی جاتی ہے، کیونکہ طبی سائنس کا اصل مقصد بیماری کا خاتمہ کرنا ہے، مریض کے جسم کو نقصان پہنچانا نہیں۔