پنجاب کی ماتحت عدالتوں میں عملے کی بھرتیوں کا 150 سالہ پرانا نظام ختم

لاہور ہائیکورٹ نے پنجاب کی ماتحت عدالتوں میں عملے کی بھرتیوں کے ۱۵۰ سالہ پرانے روایتی نظام کو مکمل طور پر ختم کر دیا ہے۔ چیف جسٹس عالیہ نیلم کی سربراہی میں منعقدہ لاہور ہائیکورٹ کے فل کورٹ اجلاس نے نئے اور جدید بھرتی رولز کی متفقہ منظوری دے دی ہے۔ اس تاریخی فیصلے کے تحت اضلاع کے سیشن ججز کے پاس ڈیڑھ صدی سے موجود ماتحت عدلیہ کے عملے کو براہِ راست ملازمتیں دینے اور بھرتی کرنے کے اختیارات کو باضابطہ طور پر ختم کر دیا گیا ہے۔

نئے نافذ العمل طریقہ کار کے مطابق اب نائب قاصد (گریڈ ۱) سے لے کر گریڈ ۱۶ تک کی تمام بنیادی اور انتظامی آسامیوں پر سیشن ججز اپنے ضلع میں براہِ راست تعیناتیاں نہیں کر سکیں گے۔ اس کی بجائے ماتحت عدالتوں میں شفاف بھرتیوں کا پورا نظام اب لاہور ہائیکورٹ کے مرکزی سیکریٹریٹ کے تحت قائم کیا جائے گا۔ نئے ضوابط کے تحت جس ضلع میں بھی عملے کی کمی ہوگی، متعلقہ سیشن جج ڈی جی اسٹیبلشمنٹ کو خالی آسامیوں کی تفصیلی رپورٹ بھیجے گا، جو ضروری چھان بین کے بعد کیس ہائیکورٹ سیکرٹریٹ کو منتقل کرے گا۔

لاہور ہائیکورٹ انتظامیہ نے ماتحت عدلیہ میں سفارشی کلچر کا خاتمہ کرنے اور مکمل میرٹ کو یقینی بنانے کے لیے یہ شفاف اور جدید نظام وضع کیا ہے۔ نئے نظام کے تحت تمام امیدواروں کا انتخاب باضابطہ تحریری امتحان اور معیاری انٹرویو کے بعد ہی کیا جائے گا۔ ہائیکورٹ فل کورٹ سے منظوری کے بعد پنجاب حکومت جلد ہی عدالتی عملے کی نئی بھرتیوں سے متعلق ان نئے رولز کا رسمی نوٹیفکیشن جاری کرے گی۔