حکومت کا انوکھا منصوبہ، والدین کو تیسرے اور چوتھے بچے کی پیدائش پر نقد انعام ملے گا

بھارت کی ریاست آندھرا پردیش کی حکومت نے آبادی کی گرتی ہوئی شرح (Declining Birth Rate) پر قابو پانے اور نوجوان افرادی قوت کو برقرار رکھنے کے لیے ایک انتہائی غیر معمولی اور منفرد پالیسی کا اعلان کر دیا ہے۔ حکومت نے فیصلہ کیا ہے کہ ریاست میں اب جوڑے جتنے زیادہ بچے پیدا کریں گے، انہیں اسی حساب سے بھاری مالی انعامات دیے جائیں گے۔بھارتی میڈیا رپورٹس کے مطابق، وزیر اعلیٰ آندھرا پردیش این چندرابابو نائیڈو نے ایک بڑے عوامی اجتماع سے خطاب کرتے ہوئے ریاست میں آبادی کی کم ہوتی ہوئی شرح پر گہری تشویش کا اظہار کیا۔ انہوں نے کہا کہ یہ معاملہ اب ایک سنجیدہ بحران بنتا جا رہا ہے، جس سے نمٹنے کے لیے روایتی خاندانی منصوبہ بندی کے بجائے زیادہ بچوں کی حوصلہ افزائی کرنا وقت کی اہم ضرورت بن چکا ہے۔ وزیر اعلیٰ نے اعلان کیا کہ ریاستی حکومت کی جانب سے خاندانوں کو درج ذیل مالی مراعات دی جائیں گی:

تیسرے بچے کی پیدائش پر: والدین کو 30 ہزار بھارتی روپے بطور انعام ملیں گے چوتھے بچے کی پیدائش پر: یہ رقم بڑھا کر 40 ہزار بھارتی روپے کر دی جائے گی۔

انہوں نے واضح کیا کہ حکومت آئندہ ایک ماہ کے اندر اس پالیسی کا باقاعدہ فریم ورک اور مکمل تفصیلات جاری کر دے گی تاکہ عوام اس اسکیم سے بھرپور فائدہ اٹھا سکیں۔ یاد رہے کہ اس سے قبل آندھرا پردیش حکومت صرف دوسرے بچے کی پیدائش پر 25 ہزار روپے دینے کی تجویز پر غور کر رہی تھی، تاہم بعد میں ریاستی وزیر صحت ستیا کمار یادو نے اس بات کی تصدیق کی کہ حکومت نے اسکیم کا دائرہ کار مزید وسیع کرتے ہوئے اب اسے تیسرے اور چوتھے بچے کی ولادت تک بڑھانے کا حتمی فیصلہ کیا ہے۔