اینکر ربیعہ احسن قتل کیس میں گرفتار ملزم کا 4 روزہ جسمانی ریمانڈ منظور

خاتون اینکر ربیعہ احسن قتل کیس میں اہم پیش رفت سامنے آئی ہے، جہاں عدالت نے گرفتار شوہر احسن طاہر کا مزید 4 روزہ جسمانی ریمانڈ منظور کر کے ملزم کو پولیس کے حوالے کر دیا ہے۔

کیس کی سماعت کے دوران راولپنڈی کے سینئر سول جج محمد نصراللہ وٹو کی عدالت میں ملزم احسن طاہر کو پیش کیا گیا۔ تفتیشی افسر نے عدالت سے ملزم کے 10 روزہ جسمانی ریمانڈ کی استدعا کی، تاہم عدالت نے 4 روز کا جسمانی ریمانڈ منظور کرتے ہوئے پولیس کو تفتیش مکمل کر کے ملزم کو 13 نومبر کو دوبارہ پیش کرنے کا حکم دیا۔

عدالت نے پولیس کو اگلی سماعت پر مکمل تفتیشی اور پوسٹ مارٹم رپورٹ پیش کرنے کی ہدایت کی ہے۔ سماعت کے دوران ملزم شوہر کی جانب سے کوئی وکیل پیش نہیں ہوا۔ قبل ازیں عدالت نے ملزم کا ایک دن کا ابتدائی جسمانی ریمانڈ دیا تھا، جس کی مدت ختم ہونے پر پولیس نے اسے دوبارہ عدالت میں پیش کیا تھا۔