فضل الرحمان کے ساتھ مل کر تحریک چلانے کی بات قبل ازوقت ہے: بیرسٹر گوہر

پاکستان تحریکِ انصاف (پی ٹی آئی) کے چیئرمین بیرسٹر گوہر علی خان نے کہا ہے کہ جے یو آئی (ف) کے سربراہ مولانا فضل الرحمان کے ساتھ مل کر باضابطہ تحریک چلانے کا فیصلہ ابھی قبل از وقت ہے، سیاسی سفر آگے بڑھے گا تو صورتحال مزید واضح ہو جائے گی۔

اڈیالہ روڈ پر میڈیا سے گفتگو کرتے ہوئے بیرسٹر گوہر نے وضاحت کی کہ پی ٹی آئی بلدیاتی انتخابات کا بالکل بائیکاٹ نہیں کر رہی بلکہ ان میں بھرپور حصہ لے گی۔ انہوں نے کہا کہ حکومت اور وزیرِ داخلہ کے ساتھ رسمی رابطے ہوتے رہتے ہیں کیونکہ ان کے لیے تمام دیگر راستے بند ہیں، تاہم اس وقت کوئی باقاعدہ بیک ڈور مذاکرات نہیں ہو رہے۔ بیرسٹر گوہر نے زور دیا کہ وہ جو بھی سیاسی حکمتِ عملی اپنا رہے ہیں وہ صرف بانی پی ٹی آئی کے مفاد میں ہے۔

سابق آرمی چیف جنرل (ر) قمر جاوید باجوہ کے ساتھ ملاقات سے متعلق پھیلنے والی خبروں کی مذمت کرتے ہوئے انہوں نے کہا کہ ان سے کوئی خاص سیاسی گفتگو نہیں ہوئی بلکہ محض رسمی ‘ہیلو ہائے’ ہوئی تھی۔ ایک سوال کے جواب میں انہوں نے خیبر پختونخوا میں تجاوزات کے خلاف بلا تفریق اور یکساں آپریشن کی حمایت کرتے ہوئے کہا کہ سرکاری زمینوں پر قبضے کسی صورت قبول نہیں ہونے چاہئیں۔