ویکسین خریداری میں مبینہ اربوں روپے کی کرپشن، گرفتار ملزم کا جوڈیشل ریمانڈ منظور

ویکسین کی خریداری میں اربوں روپے کی مبینہ کرپشن اور مالی بے ضابطگیوں کے کیس میں اہم پیش رفت سامنے آئی ہے، جہاں عدالت نے گرفتار ملزم عثمان کو 14 روزہ جوڈیشل ریمانڈ پر جیل بھیجنے کا حکم دے دیا ہے۔

ایف آئی اے (Federal Investigation Agency) نے کراچی سے گرفتار ملزم عثمان ولد محمد وصال کا 7 روزہ جسمانی ریمانڈ مکمل ہونے پر اسے ڈسٹرکٹ اینڈ سیشن کورٹ میں جوڈیشل مجسٹریٹ کے سامنے پیش کیا۔ سماعت کے دوران عدالت نے ایف آئی اے کی تفتیشی ٹیم کو کیس کا چالان جلد سے جلد جمع کرانے کی ہدایت کی، جبکہ کیس میں نامزد دیگر ملزمان پہلے ہی جوڈیشل ریمانڈ پر جیل میں قید ہیں۔

مقدمے میں نامزد ملزمان پر ویکسین کے 5 سالہ ٹھیکے کے دوران سنگین مالی بے ضابطگیوں اور من پسند کمپنی کو ناجائز فائدہ پہنچانے کا الزام ہے۔ ایف آئی اے کے مطابق ان مالی بے ضابطگیوں اور بدعنوانی کی وجہ سے قومی خزانے کو تقریباً 2 ارب 44 کروڑ 50 لاکھ روپے کا بھاری نقصان پہنچا ہے۔