مری میں سکول ٹرپ کی بس الٹ گئی، ڈرائیور جاں بحق، 25 طلبہ و طالبات زخمی

مری کے قریب شوالہ لنک روڈ پر مری سے گوجرانوالہ واپس جانے والی اسکول ٹرپ کی کوسٹر بس موڑ کاٹتے ہوئے بے قابو ہو کر الٹ گئی، جس کے نتیجے میں بس ڈرائیور موقع پر جاں بحق جبکہ 25 کے قریب طلبہ و طالبات زخمی ہو گئے ہیں۔

واقعے کی اطلاع ملتے ہی ضلعی انتظامیہ، ریسکیو 1122، مری پولیس اور ٹریفک پولیس کی نفری نے موقع پر پہنچ کر ریسکیو آپریشن شروع کیا۔ تمام زخمی طلبہ کو فوری طور پر ابتدائی طبی امداد کی فراہمی کے بعد تحصیل ہیڈ کوارٹر (ٹی ایچ کیو) ہسپتال منتقل کر دیا گیا ہے۔

ڈی پی او مری رضا تنویر سپرا نے حادثے کا سخت نوٹس لیتے ہوئے ڈی ایس پی لیگل اور ڈی ایس پی ٹریفک پر مشتمل دو رکنی انکوائری کمیٹی تشکیل دے دی ہے۔ کمیٹی کو حادثے کے تکنیکی اسباب، روڈ سیفٹی اور ڈرائیور کی غفلت کا جائزہ لے کر جامع رپورٹ پیش کرنے کی ہدایت کی گئی ہے تاکہ ذمہ داروں کے خلاف قانونی کارروائی کی جا سکے۔