اپنی کامیابی پاکستان کی تمام خواتین کے نام کرتی ہوں: انعم عزیر

کوہ پیمائی اور ٹریل رننگ کی دنیا میں اپنی منفرد شناخت بنانے والی معروف پاکستانی مہم جو انعم عزیر نے ملک کی پہلی 100 کلومیٹر گلیات ماؤنٹین ٹریل الٹرا میراتھون اپنے نام کر کے ایک اور اہم سنگِ میل عبور کر لیا ہے۔ دشوار گزار پہاڑی راستوں، گھنے جنگلات اور قدرتی خطرات سے بھرپور اس انتہائی سخت مقابلے میں انہوں نے غیر معمولی کارکردگی کا مظاہرہ کرتے ہوئے تاریخی کامیابی حاصل کی۔

کامیابی کے بعد میڈیا سے گفتگو کرتے ہوئے انعم عزیر کا کہنا تھا کہ وہ اپنی یہ جیت پاکستان کی تمام خواتین اور بالخصوص خواتین رنرز کے نام کرتی ہیں۔ انہوں نے کہا کہ ٹریل رننگ اور کوہ پیمائی میں ہمیشہ خطرات رہتے ہیں؛ یہاں آسمانی بجلی اور جنگلی حیات کا بڑا چیلنج تھا، یہاں تک کہ پریکٹس کے دوران انہوں نے ٹریک پر تیندوے کو بھی دیکھا، لیکن مسلسل مشق سے خوف بالکل ختم ہو چکا تھا۔

انعم عزیر نے عزم ظاہر کیا کہ وہ مستقبل میں بھی مزید مشکل چیلنجز قبول کر کے عالمی سطح پر پاکستان کا پرچم بلند کرتی رہیں گی۔ انہوں نے عوام کو پیغام دیا کہ فٹنس کو کسی مقابلے تک محدود رکھنے کے بجائے اسے اپنا لائف اسٹائل بنائیں تاکہ صحت مند اور باہمت زندگی گزاری جا سکے۔