امریکا: 28 گھنٹوں تک سنگلز پکل بال کھیلنے کا گینیز ورلڈ ریکارڈ

امریکی ریاست مشیگن سے تعلق رکھنے والے دو سرپھرے کھلاڑیوں، بریڈ ہیورکیمپ اور کیلب ڈینگ نے طویل ترین پکل بال سنگلز میراتھون کا گینیز ورلڈ ریکارڈ قائم کر دیا ہے۔ دونوں کھلاڑیوں نے انسانی برداشت کی تمام حدیں عبور کرتے ہوئے مسلسل 28 گھنٹوں تک کھیل جاری رکھا۔

ریکارڈ کی کوشش اور کڑی شرائط:

گینیز ورلڈ ریکارڈز کی سخت شرائط کے تحت، کھلاڑیوں کو ہر ایک گھنٹے کے کھیل کے بعد صرف 5 منٹ کے وقفے کی اجازت تھی۔ یہ چیلنج گزشتہ سال نومبر میں شروع کیا گیا تھا، جس کی باقاعدہ تصدیق رواں ماہ گینیز ورلڈ ریکارڈز نے تمام شواہد دیکھنے کے بعد کی ہے۔

“دماغ کام کرنا چھوڑ گیا تھا”

ریکارڈ ساز کھلاڑی کیلب ڈینگ نے اپنے تجربے کے بارے میں گفتگو کرتے ہوئے بتایا کہ 20 گھنٹے مسلسل کھیلنے کے بعد ان کی حالت ایسی تھی کہ دماغ نے کام کرنا چھوڑ دیا تھا اور وہ ‘آٹو پائلیٹ’ موڈ پر چلے گئے تھے۔ انہوں نے انکشاف کیا کہ تھکن کی وجہ سے وہ ایک موقع پر مکمل ‘بلیک آؤٹ’ بھی ہو گئے تھے، لیکن اس کے باوجود انہوں نے کھیل جاری رکھا اور منزل حاصل کی۔

پکل بال، جو ٹینس، بیڈمنٹن اور پنگ پونگ کا امتزاج ہے، امریکہ میں تیزی سے مقبول ہونے والا کھیل ہے اور اس ریکارڈ نے اس کھیل کی مقبولیت کو مزید چار چاند لگا دیے ہیں۔