امریکا: خزانے کی تلاش میں نکلے خاندان کی قسمت کُھل گئی

امریکا میں اپنے اہلِ خانہ کے ساتھ سیر کے لیے جانے والے ایک شخص کے ہاتھ غیر متوقع طور پر قیمتی خزانہ لگ گیا۔ آرکنساس اسٹیٹ پارکس کے مطابق یہ دلچسپ واقعہ پائیک کاؤنٹی میں واقع مشہور کریٹر آف ڈائمنڈز اسٹیٹ پارک میں پیش آیا، جہاں 41 سالہ جیمز وارڈ نے 30 دسمبر کو 2.09 قیراط وزنی کتھئی رنگ کا ہیرا دریافت کیا۔

ٹیکساس کے علاقے سائپریس سے تعلق رکھنے والے جیمز وارڈ اپنی اہلیہ الزبتھ وارڈ اور دو کم سن بیٹوں، 9 سالہ ایڈرین اور 7 سالہ آسٹن کے ساتھ پارک کی سیر کے لیے آئے تھے۔ دلچسپ بات یہ ہے کہ اس پارک کا خیال دراصل ان کے سب سے چھوٹے بیٹے آسٹن نے پیش کیا تھا۔

الزبتھ وارڈ کے مطابق ایک دن گھر پر ٹی وی دیکھتے ہوئے آسٹن نے سوال کیا کہ آیا ٹیکساس یا اس کے آس پاس کوئی ایسی جگہ ہے جہاں وہ کرسٹل تلاش کر سکیں۔ اس پر انہوں نے فوراً سِری کے ذریعے تلاش کیا، جہاں انہیں کریٹر آف ڈائمنڈز اسٹیٹ پارک کے بارے میں معلوم ہوا۔
الزبتھ نے بتایا کہ انہوں نے یہ معلومات جیمز کو بھیجیں تو ان کا جواب تھا:
“یہ تو صرف چھ گھنٹے کی ڈرائیو ہے!”

یہ قیمتی ہیرا، جسے بعد ازاں ’وارڈ ڈائمنڈ‘ کا نام دیا گیا، تلاش کے دوسرے دن دریافت ہوا۔ پہلے دن سرد موسم اور طویل مشقت کے باعث خاندان خاصا تھک گیا تھا، تاہم 9 سالہ ایڈرین نے سب کو اگلے دن دوبارہ کوشش پر آمادہ کیا۔ قسمت نے مسکراہٹ بکھیری اور اسی دن انہیں یہ نایاب ہیرا مل گیا۔

یاد رہے کہ کریٹر آف ڈائمنڈز اسٹیٹ پارک دنیا کا واحد ایسا عوامی پارک ہے جہاں عام شہری قانونی طور پر ہیرے تلاش کر سکتے ہیں اور جو کچھ انہیں ملے، وہ ان کا ہی ہوتا ہے۔