سعودی عرب کی جانب سے پاکستان کو مزید 1 ارب ڈالر کے فنڈز موصول

سعودی عرب کی جانب سے پاکستان کی معاشی معاونت کے سلسلے میں ایک اور بڑی پیش رفت سامنے آئی ہے، جہاں اسٹیٹ بینک آف پاکستان نے مزید 1 ارب ڈالر کے فنڈز موصول ہونے کی تصدیق کر دی ہے۔ اسٹیٹ بینک کے مطابق، 15 اپریل کو 2 ارب ڈالر کی پہلی قسط کے بعد اب 20 اپریل کو ایک ارب ڈالر کی دوسری قسط بھی وصول ہو چکی ہے، جس کے ساتھ ہی سعودی عرب کی جانب سے مجموعی طور پر 3 ارب ڈالر کے ڈپازٹس کی یقین دہانی مکمل ہو گئی ہے۔

وفاقی وزیرِ خزانہ محمد اورنگزیب نے اس حوالے سے پہلے ہی اشارہ دیا تھا کہ یہ فنڈز جلد پاکستان کو منتقل کر دیے جائیں گے۔ اس کے علاوہ، حکومتِ پاکستان اور سعودی عرب کے درمیان 5 ارب ڈالر کے پرانے ڈپازٹس پر بھی اہم پیش رفت ہوئی ہے، جنہیں اب سالانہ بنیادوں پر رول اوور کرنے کے بجائے 3 سال کی طویل مدت کے لیے توسیع (میچورٹی 2028 تک) دی جائے گی، جو ملکی معیشت کے لیے ایک بڑی سہولت ثابت ہوگی۔