ٹرمپ مذاکرات کی میز کو ہتھیار ڈالنے میں تبدیل کرنا چاہتے ہیں: باقر قالیباف

ایرانی قیادت کی جانب سے امریکہ کے سخت گیر رویے اور سفارتی دباؤ کے خلاف ایک بھرپور اور واضح موقف سامنے آیا ہے، جس میں مذاکرات کو دھمکیوں سے مشروط کرنے کی پالیسی کو یکسر مسترد کر دیا گیا ہے۔ ایرانی پارلیمنٹ کے سپیکر باقر قالیباف نے سوشل میڈیا پر اپنے دوٹوک پیغام میں کہا ہے کہ نومنتخب امریکی صدر ڈونلڈ ٹرمپ مذاکرات کی میز کو “ہتھیار ڈالنے کی میز” میں تبدیل کرنے کی ناکام کوشش کر رہے ہیں۔ انہوں نے خبردار کیا کہ آبنائے ہرمز کی ناکہ بندی اور جنگ بندی کی خلاف ورزیاں ٹرمپ کی خود فریبی ہے، اور ایران ایسے کسی بھی دباؤ کے تحت مذاکرات قبول نہیں کرے گا۔ قالیباف نے مزید انکشاف کیا کہ ایران نے گزشتہ دو ہفتوں کے دوران میدانِ جنگ میں اپنی طاقت کے نئے جوہر دکھانے کے لیے بھرپور تیاری کر لی ہے۔

دوسری جانب، ایرانی وزارتِ خارجہ نے بھی امریکی مطالبات کو غیر حقیقی اور غیر سنجیدہ قرار دیتے ہوئے واضح کیا ہے کہ سفارت کاری ہی بحران کا واحد حل ہے۔ نائب وزیرِ خارجہ سعید خطیب زادے نے زور دیا کہ امریکہ کو اپنے حد سے بڑھے ہوئے مطالبات ترک کر کے ایرانی عوام کے حقوق کا احترام کرنا ہوگا، کیونکہ جنگ کا راستہ وہ پہلے ہی آزما چکا ہے جس سے کچھ حاصل نہیں ہوا۔ ترجمان وزارتِ خارجہ اسماعیل بقائی نے خبردار کیا کہ اگر واشنگٹن نے ماضی کی غلطیاں دہرائیں تو ایران فیصلہ کن انتقامی کارروائی کرے گا۔ انہوں نے یہ بھی واضح کر دیا کہ جوہری مواد کی بیرونِ ملک منتقلی جیسے مطالبات کبھی بھی مذاکراتی ایجنڈے کا حصہ نہیں رہے اور نہ ہی ہوں گے۔