علیمہ خان کیس: مسلسل غیر حاضری پر اسٹیٹ کونسل مقرر کرنے کی درخواست، وکلاء کو نوٹس

26 نومبر کے احتجاج پر تھانہ صادق آباد میں درج مقدمے کی انسداد دہشت گردی عدالت میں اہم سماعت ہوئی، جس میں استغاثہ نے علیمہ خان کی مسلسل غیر حاضری پر اسٹیٹ کونسل مقرر کرنے کی درخواست دائر کر دی۔

اسپیشل پراسیکیوٹر ظہیر شاہ کی جانب سے انسداد دہشت گردی ایکٹ کی دفعہ 19/8 کے تحت دائر درخواست میں مؤقف اختیار کیا گیا کہ ملزمہ اور وکیل صفائی غیر ذمہ دار رویہ اختیار کیے ہوئے ہیں اور جان بوجھ کر تاخیری حربے استعمال کر رہے ہیں۔ استغاثہ کے مطابق مقدمے کی 24 سماعتیں ہو چکی ہیں جن میں سے 15 پر ملزمہ غیر حاضر رہیں، جبکہ 18 گواہان کے بیانات ریکارڈ ہو چکے ہیں مگر وکیل صفائی نے گواہان پر جرح نہیں کی۔

درخواست میں عدالت سے استدعا کی گئی کہ اگر ملزمہ اور وکیل صفائی ٹرائل میں سنجیدہ نہیں تو ملزمہ کی ضمانت منسوخ کی جائے یا ان کے لیے سرکاری وکیل مقرر کیا جائے۔

عدالت نے علیمہ خان کے وکلاء کو نوٹس جاری کرتے ہوئے سماعت کل تک ملتوی کر دی۔ سماعت کے دوران علیمہ خان کے وکیل فیصل ملک عدالت میں پیش ہوئے، جبکہ عدالت نے ملزمہ کی جانب سے ایک روزہ حاضری سے استثنیٰ کی درخواست منظور کر لی۔ وکیل صفائی نے عدالت کو یقین دہانی کرائی کہ علیمہ خان کل پیش ہوں گی۔

مقدمے کی سماعت انسداد دہشت گردی عدالت کے جج امجد علی شاہ نے کی۔