غلط طیارے کا انتخاب، ایئر انڈیا کی پرواز 8 گھنٹے ہوا میں گھوم کر واپس

نئی دہلی: ایئر انڈیا کی دہلی سے کینیڈا جانے والی پرواز ‘اے آئی 185’ کو ایک غیر معمولی آپریشنل غلطی کے باعث آدھے راستے سے واپس دہلی آنا پڑا۔ طیارہ تقریباً چار گھنٹے کی مسافت طے کر کے جب چین کی فضائی حدود میں داخل ہوا، تو ایئرلائن انتظامیہ کو احساس ہوا کہ جس طیارے کا انتخاب کیا گیا ہے، اسے کینیڈا کی فضائی حدود میں داخلے یا لینڈنگ کے لیے مطلوبہ تکنیکی منظوری حاصل نہیں۔

بھارتی میڈیا کے مطابق، اس غلطی کا ادراک ہوتے ہی پرواز کو فوری طور پر واپس مڑنے کی ہدایت کی گئی۔ طیارہ مجموعی طور پر آٹھ گھنٹے فضا میں رہنے کے بعد دوبارہ دہلی کے اندرا گاندھی انٹرنیشنل ایئرپورٹ پر بحفاظت لینڈ کر گیا۔ ایئر انڈیا کا کہنا ہے کہ یہ فیصلہ حفاظتی اور آپریشنل تقاضوں کو مدنظر رکھتے ہوئے کیا گیا تاکہ کینیڈا پہنچنے پر کسی قانونی یا تکنیکی پیچیدگی سے بچا جا سکے۔

ایئرلائن نے اس واقعے پر مسافروں سے معذرت کی ہے اور متاثرہ افراد کو ہوٹل میں قیام سمیت دیگر سہولیات فراہم کی گئی ہیں۔ ماہرینِ ہوابازی کا کہنا ہے کہ اس قسم کی غلطی سے ایئرلائن کو نہ صرف ایندھن کی مد میں بھاری مالی نقصان اٹھانا پڑا ہے بلکہ بین الاقوامی سطح پر ایئرلائن کے آپریشنل انتظام پر بھی سوالات اٹھ رہے ہیں۔ متاثرہ مسافروں کو اگلے روز متبادل طیارے کے ذریعے کینیڈا روانہ کرنے کے انتظامات مکمل کر لیے گئے ہیں۔