ارشد ندیم کی کامن ویلتھ گیمز میں ناقص کارکردگی، اتھلیٹکس فیڈریشن نے نوٹس لے لیا

کامن ویلتھ گیمز میں پاکستان کے اولمپک گولڈ میڈلسٹ جیولن تھروور ارشد ندیم کی غیر متوقع کارکردگی کے بعد پاکستان ایتھلیٹکس فیڈریشن (AFP) نے معاملے کا سخت نوٹس لیتے ہوئے حکومت، بین الصوبائی رابطہ (IPC) ڈویژن اور پاکستان اسپورٹس بورڈ (PSB) سے رجوع کرنے کا فیصلہ کیا ہے۔ فیڈریشن ذرائع کے مطابق AFP جلد حکومت کو ایک تفصیلی خط ارسال کرے گی جس میں قومی ایتھلیٹ کے اعزاز کے دفاع میں ناکامی، غیر کوالیفائیڈ کوچ کے انتخاب اور انتظامی اختلافات سے متعلق آگاہ کیا جائے گا۔ ذرائع نے مؤقف اختیار کیا کہ گزشتہ پیرس اولمپکس اور کامن ویلتھ گیمز میں ارشد ندیم نے فیڈریشن کی دیکھ بھال میں تاریخی کامیابیاں حاصل کی تھیں، تاہم اس بار مبینہ مخالفت اور نامناسب کوچنگ کی وجہ سے 04 سال بعد منعقد ہونے والے اس میگا ایونٹ میں پاکستان کا قومی مفاد متاثر ہوا۔