ٹیم میں واپسی کیلئے محنت کررہا تھا، کم بیک ٹیسٹ میں پرفارمنس اچھی رہی: عبداللہ شفیق

ویسٹ انڈیز کے خلاف دوسرے ٹیسٹ میں شاندار سنچری اسکور کر کے ‘مین آف دی میچ’ کا اعزاز حاصل کرنے والے قومی بیٹر عبداللہ شفیق نے کہا ہے کہ وہ ٹیم میں کم بیک کے لیے مسلسل محنت کر رہے تھے۔ انہوں نے اعتراف کیا کہ میدان میں اترتے وقت انہیں ایسا محسوس ہو رہا تھا جیسے وہ اپنا ڈیبیو میچ کھیل رہے ہوں، اور کم بیک ٹیسٹ میں ایسی پرفارمنس پر وہ بے حد خوش ہیں۔

عبداللہ شفیق کا کہنا تھا کہ گزشتہ تین چار ٹیسٹ میچوں میں قومی ٹیم کی مجموعی بیٹنگ پرفارمنس اچھی نہیں رہی تھی، لیکن اس میچ میں کھلاڑیوں نے ذمہ داری کا مظاہرہ کیا۔ انہوں نے مزید کہا کہ پہلی اننگز میں کپتان بابر اعظم کے ساتھ قائم ہونے والی شراکت داری میچ میں پاکستان کی پوزیشن مضبوط کرنے کے حوالے سے انتہائی اہم اور بہترین ثابت ہوئی۔