جعلی افسر بن کر سیاسی رہنما سے شادی کرنیوالی خاتون زیورات و قیمتی سامان لے کر فرار

بھارتی ریاست پنجاب میں حکمران جماعت ‘عام آدمی پارٹی’ (AAP) کے مقامی رہنما امرندر سنگھ منڈوفل ایک بڑی دھوکا دہی کا شکار ہو گئے ہیں، جہاں ایک خاتون خود کو جعلی پی سی ایس (پنجاب سول سروس) افسر ظاہر کر کے ان سے شادی رچانے کے بعد زیورات اور قیمتی سامان سمیٹ کر فرار ہو گئی۔

تفصیلات کے مطابق امرندر سنگھ کی رواں سال فروری 2026 میں من وندر کور نامی خاتون سے شادی ہوئی تھی، جس کی تقریب میں سیاسی شخصیات اور رشتہ داروں نے بڑی تعداد میں شرکت کی تھی۔ تاہم شادی کے بعد تحقیقات پر انکشاف ہوا کہ خاتون نے نہ صرف اپنی سرکاری حیثیت اور عمر سے متعلق جھوٹ بولا بلکہ وہ پہلے سے طلاق یافتہ اور ایک 18 سالہ بیٹے کی ماں بھی ہے۔ خاتون اپنے گھر والوں کی ملی بھگت سے سونا، چاندی اور دیگر قیمتی سامان لے کر گھر سے فرار ہو گئی۔ اے اے پی رہنما کی شکایت پر پولیس نے مرکزی ملزمہ، اس کی والدہ، بھائی اور سابق گاؤں سرپنچ سمیت 6 افراد کے خلاف دھوکہ دہی اور جعل سازی کا مقدمہ درج کر کے قانونی کارروائی شروع کر دی ہے۔