ٹرمپ کی دھمکی؛ ایران نے پلان ’بی‘ بنالیا؛ خامنہ ای کی ماسکو روانگی کا امکان

ایران کے سپریم لیڈر آیت اللہ علی خامنہ ای نے ملک میں جاری مظاہروں اور بڑھتے حکومتی دباؤ کے پیش نظر پلان بی تیار کر لیا ہے، جس کے تحت انتہائی حالات میں وہ ایران چھوڑ کر روس منتقل ہو سکتے ہیں۔ برطانوی اخبار دی ٹائمز کی انٹیلی جنس رپورٹ کے مطابق اگر حکومت مخالف احتجاج اس حد تک بڑھ گیا کہ سیکیورٹی فورسز قابو پانے میں ناکام رہیں یا احکامات ماننے سے انکار کر دیں تو سپریم لیڈر ملک چھوڑنے کا فیصلہ کر سکتے ہیں۔

رپورٹ میں بتایا گیا ہے کہ آیت اللہ خامنہ ای اپنے قریبی حلقے، اہل خانہ اور ممکنہ طور پر اپنے بیٹے مجتبیٰ خامنہ ای کے ساتھ ماسکو منتقل ہونے کا منصوبہ بنا رہے ہیں، جہاں روسی حمایت اور مضبوط سفارتی تعلقات کو محفوظ سمجھا جا رہا ہے۔ ایران میں مہنگائی، کرنسی کی قدر میں کمی، بے روزگاری اور امریکی پابندیوں کے باعث عوامی بے چینی میں اضافہ ہوا ہے، جس کے نتیجے میں بڑے پیمانے پر مظاہرے سامنے آئے ہیں۔

دوسری جانب آیت اللہ خامنہ ای مظاہروں کو فسادی قرار دے چکے ہیں اور سیکیورٹی فورسز کو سخت کارروائی کی ہدایت دی ہے، جس پر امریکی صدر ڈونلڈ ٹرمپ کی جانب سے سخت ردعمل کی دھمکی کے بعد ماسکو منتقلی کا پلان بی منظر عام پر آیا ہے۔