فٹبال گراؤنڈ میں پیراٹروپر کے تماشائیوں پر گرنے کا انوکھا واقعہ

آرمڈ فورسز باؤل 2026 کے آغاز سے قبل ایک سکائی ڈائیونگ مظاہرے کے دوران حادثہ پیش آیا، جس میں چار سِول پیرا ٹروپرز میں سے ایک کا پیراشوٹ فیلڈ گول کے جال سے الجھ گیا اور وہ تقریباً 30 سے 35 فٹ کی بلندی سے تماشائیوں میں جا گرا۔

یہ واقعہ رائس یونیورسٹی اور ٹیکساس اسٹیٹ یونیورسٹی کے درمیان میچ سے قبل پیش آیا۔ وائرل ہونے والی ویڈیو میں دیکھا جا سکتا ہے کہ پیرا ٹروپر ہوائی چھلانگ کے بعد میدان کی جانب اتر رہا تھا کہ اچانک فیلڈ گول کے جال میں پھنس گیا۔ جال سے آزاد ہونے کے بعد وہ بلندی سے نیچے گر پڑا، تاہم خوش قسمتی سے چند ہی سیکنڈز میں خود کھڑا ہو گیا اور اسے کوئی بڑی چوٹ نہیں آئی۔

حادثے کے دوران رائس یونیورسٹی کے ایک کھلاڑی، ڈیفنس بیک ڈیوون ہُک، زخمی ہو گئے جنہیں فوری طور پر قریبی اسپتال منتقل کر دیا گیا۔ ہُک کی چوٹ کی نوعیت سے متعلق تاحال کوئی تفصیلات جاری نہیں کی گئیں۔

انتظامیہ کے مطابق واقعے میں پیرا ٹروپر کی شناخت تاحال منظرِ عام پر نہیں آئی، جبکہ اس حادثے میں دیگر تماشائیوں کو کسی قسم کا نقصان نہیں پہنچا۔