چوہے 200 کلو چرس کھا گئے، منشیات سمگلنگ کا مرکزی ملزم رہا

بھارت میں ایک حیران کن واقعے میں عدالت نے منشیات سمگلنگ کے ایک مقدمے میں مرکزی ملزم کو بری کر دیا، جہاں پولیس نے دعویٰ کیا کہ ضبط کی گئی تقریباً 200 کلوگرام چرس گودام میں چوہے کھا گئے۔

بھارتی میڈیا کے مطابق ریاست جھارکھنڈ کی عدالت نے کیس کی سماعت کے دوران شواہد کو سنبھالنے میں سنگین کوتاہیوں پر پولیس کو سخت تنقید کا نشانہ بنایا۔ یہ مقدمہ سال 2022 میں درج کیا گیا تھا، جب پولیس نے قومی شاہراہ پر ایک گاڑی کو روک کر اس میں چھپائی گئی بھاری مقدار میں چرس برآمد کرنے کا دعویٰ کیا تھا۔

ٹرائل کے دوران پولیس نے عدالت کو بتایا کہ ضبط شدہ تقریباً 200 کلوگرام چرس، جس کی مالیت لگ بھگ 3 کروڑ پاکستانی روپے بتائی گئی، گودام میں موجود چوہوں نے کھا لی، جس کے باعث اب بطور ثبوت پیش کرنا ممکن نہیں۔

عدالت نے پولیس کے اس مؤقف کو ناقابلِ قبول قرار دیتے ہوئے کہا کہ اس طرح کی وضاحت نہ صرف ناقص ہے بلکہ اس سے پورے کیس کے طریقہ کار اور پولیس کی سنجیدگی پر بھی سنگین سوالات جنم لیتے ہیں۔ جج نے ریمارکس دیے کہ شواہد کی حفاظت قانون نافذ کرنے والے اداروں کی بنیادی ذمہ داری ہے، جس میں ناکامی انصاف کے تقاضوں کے منافی ہے۔

عدالت نے ناکافی شواہد اور پولیس کی غفلت کے باعث مرکزی ملزم کو بری کرنے کا حکم دے دیا۔ اس فیصلے کے بعد بھارتی پولیس کے تفتیشی نظام اور شواہد کے تحفظ پر ایک بار پھر سوالات اٹھنے لگے ہیں۔