صبا قمر کا اپنا نام استعمال کر کے سستی شہرت حاصل کرنے والوں کو کرارا جواب

پاکستانی شوبز انڈسٹری کی عالمی شہرت یافتہ اداکارہ صبا قمر نے اپنا نام استعمال کر کے سستی شہرت حاصل کرنے والوں کو دوٹوک جواب دے دیا ہے۔

حالیہ دنوں میں صبا قمر کے خلاف پولیس یونیفارم بغیر اجازت پہننے پر مقدمہ درج کرنے کے لیے درخواست دائر کیے جانے کی خبروں پر اداکارہ نے انسٹاگرام پر وضاحت جاری کی۔ انہوں نے خبر کا اسکرین شاٹ شیئر کرتے ہوئے متعلقہ حکام کو بھیجی گئی اپنی درخواست بھی منظرِ عام پر لائی۔

صبا قمر کے مطابق یہ درخواست 31 ستمبر 2021 کو ڈی آئی جی آپریشنز لاہور کو ارسال کی گئی تھی، جس میں ’’پاکستان کی امیج کی بہتری‘‘ کے مقصد سے ڈی جی پی آر پنجاب کے ایک پروجیکٹ کے لیے پولیس یونیفارم خریدنے اور استعمال کرنے کی باضابطہ اجازت طلب کی گئی تھی۔

اداکارہ نے اس معاملے کو پبلسٹی حاصل کرنے کی کوشش قرار دیتے ہوئے کہا کہ کچھ لوگ ان کا نام استعمال کر کے شہرت حاصل کرنا چاہتے ہیں۔ انہوں نے ناقدین کو مخاطب کرتے ہوئے کہا کہ ’’براہِ کرم شہرت کے لیے کسی اور کو تلاش کریں، آج میں جہاں ہوں وہ صرف محنت کا نتیجہ ہے۔‘‘

صبا قمر نے مزید کہا کہ ہر شخص کو اپنے سفر پر توجہ دینی چاہیے کیونکہ ہر کسی کا وقت ضرور آتا ہے۔