روس کی پاک افغان کشیدگی کے خاتمے کیلئے ثالثی کی پیشکش

روس نے پاکستان اور افغانستان کے درمیان بڑھتی ہوئی سرحدی کشیدگی کے خاتمے، امن کی بحالی اور مسائل کے حل میں فعال تعاون کی پیشکش کر دی ہے۔

اسلام آباد کے ‘انسٹیٹیوٹ آف اسٹریٹیجک اسٹڈیز’ (ISSI) میں پاک روس تعلقات پر خطاب کرتے ہوئے روسی سفیر البرٹ پی خورئیف نے کہا کہ روس دونوں پڑوسی ممالک کے درمیان سرحدی تنازعات کا جلد از جلد حل اور سرحدی گزرگاہوں کی مکمل بحالی چاہتا ہے۔ انہوں نے واضح کیا کہ بارڈر کی بندش سے صرف پاک افغان تجارت ہی نہیں بلکہ وسطی ایشیائی ریاستوں اور روس کے ساتھ علاقائی تجارتی روابط بھی شدید متاثر ہو رہے ہیں۔

تقریب سے خطاب میں روس میں تعینات پاکستانی سفیر فیصل ترمذی نے نشاندہی کی کہ افغان سرزمین سے پاکستان میں دراندازی کی جاتی ہے اور افغانستان کا مسئلہ ایک ایسی گرہ ہے جسے پاکستان اور روس مل کر کھولنے کی کوشش کر رہے ہیں۔ انہوں نے بتایا کہ روس طالبان حکومت پر مسلسل زور دے رہا ہے کہ وہ اپنی سرزمین کسی دوسرے ملک کے خلاف استعمال نہ ہونے دے۔ انہوں نے امید ظاہر کی کہ اگلے سال روسی صدر ولادی میر پیوٹن شنگھائی تعاون تنظیم (SCO) کے اجلاس میں شرکت کے لیے پاکستان کا دورہ کریں گے۔ اس موقع پر سابق سفیر مسعود خان نے زور دیا کہ دنیا اور روس کو اب پاکستان کو بھارت یا افغانستان کے تناظر کے بجائے ایک مستقل اور آزاد شراکت دار کے طور پر دیکھنا چاہیے۔