سینیٹ میں ارکان سینیٹ کو لائف ٹائم بلیو پاسپورٹ دینےکا بل منظور

سینیٹ نے ارکانِ پارلیمنٹ کو لائف ٹائم بلیو پاسپورٹ کی فراہمی کے لیے پاسپورٹ ایکٹ ترمیمی بل اتفاقِ رائے سے منظور کر لیا ہے۔ سینیٹر عبدالقادر کی جانب سے پیش کیے گئے اس بل کے تحت قومی اسمبلی یا سینیٹ کا حلف اٹھانے والا کوئی بھی رکن ریٹائرمنٹ کے بعد بھی بلیو پاسپورٹ رکھنے کا اہل ہوگا، خواہ اس نے اپنی مدت مکمل کی ہو یا نہیں۔ ایوان میں بحث کے دوران ارکان کے بچوں کو بھی یہ سہولت دینے کی تجویز دی گئی تھی، تاہم حکومت نے اس کی مخالفت کی۔ وزیر مملکت برائے داخلہ طلال چوہدری اور وفاقی وزیر قانون اعظم نذیر تارڑ نے واضح کیا کہ بلیو پاسپورٹس کی زیادہ تعداد گرین پاسپورٹ کی بین الاقوامی رینکنگ اور ویزا فری مذاکرات پر منفی اثر ڈالتی ہے، اسی لیے حکومت جلد ریٹائرڈ افسران اور سابق سیکرٹریز کے بچوں سے بھی بلیو پاسپورٹ واپس لینے کے لیے قانون سازی لائے گی۔