پی ایس ایل 11: وسیم اکرم برانڈ ایمبیسڈر مقرر، ملتان سلطانز سے متعلق بھی اہم اعلان

پاکستان کرکٹ بورڈ (پی سی بی) نے قومی کرکٹ ٹیم کے سابق کپتان وسیم اکرم کو پاکستان سپر لیگ (پی ایس ایل) کا برانڈ ایمبیسڈر مقرر کر دیا ہے۔

چیئرمین پی سی بی محسن نقوی نے لاہور میں پریس کانفرنس کرتے ہوئے بتایا کہ پی ایس ایل 11 کا آغاز 26 مارچ کے بجائے 23 مارچ سے کرنے پر غور کیا جا رہا ہے، تاہم اس حوالے سے حتمی فیصلہ فرنچائزز سے مشاورت کے بعد کیا جائے گا۔

محسن نقوی نے کہا کہ اس سال ملتان سلطانز کو پی سی بی خود آپریٹ کرے گا اور فرنچائز کی نیلامی پی ایس ایل کے اختتام کے بعد کی جائے گی۔ ان کا کہنا تھا کہ پی سی بی ملک میں کرکٹ کے فروغ اور بہتری کے لیے مسلسل اقدامات کر رہا ہے۔

انہوں نے بتایا کہ پی ایس ایل ٹیموں کی بڈنگ 8 جنوری کو اسلام آباد میں ہوگی جبکہ تمام فرنچائزز کی مشاورت سے ٹورنامنٹ کی تاریخوں کو حتمی شکل دی جائے گی۔

چیئرمین پی سی بی نے انڈر 19 ایشیا کپ کے دوران بھارتی کھلاڑیوں کے نامناسب رویے پر بھی بات کرتے ہوئے کہا کہ اس حوالے سے آئی سی سی کو خط لکھ دیا گیا ہے۔ ان کا کہنا تھا کہ اگر بھارتی کھلاڑی ہاتھ نہیں ملانا چاہتے تو پاکستان کو بھی اس پر کوئی اصرار نہیں، کیونکہ وزیر اعظم کی واضح ہدایت ہے کہ کھیل کو سیاست سے دور رکھا جانا چاہیے۔