ماسکو میں ڈائمنڈ بٹر فلائی فلم ایوارڈز، روسی فلم ’’اگست‘‘ نے 10 لاکھ ڈالر کا اعزاز جیت لیا

روس کے دارالحکومت ماسکو میں منعقدہ دوسرے بین الاقوامی یوریشیائی فلم ایوارڈز ’’ڈائمنڈ بٹر فلائی‘‘ کی رنگا رنگ تقریب میں پاکستانی فلم ’’میرا لیاری‘‘ کی اداکارہ دنانیر مبین نے بہترین اداکارہ کا بین الاقوامی اعزاز اپنے نام کر کے ملک کا نام روشن کر دیا، جس پر انہیں یادگاری ٹرافی کے ساتھ ڈھائی لاکھ امریکی ڈالر مالیت کا پانچ قیراط کا قیمتی ہیرا بھی پیش کیا گیا۔ معروف روسی فلم ساز نکیتا میخالکوف کے تھیٹر ’’ورکشاپ 12‘‘ میں منعقد ہونے والی اس تقریب میں پاکستان سمیت 19 ممالک کی 41 فلموں نے حصہ لیا، جبکہ تقریب کا سب سے بڑا اعزاز روسی فلم ’’اگست‘‘ نے حاصل کیا جس کے تخلیق کاروں کو دس لاکھ امریکی ڈالر مالیت کا دس قیراط کا ہیرا دیا گیا۔ تقریب سے روسی صدر ولادیمیر پوتن نے خصوصی ویڈیو پیغام میں ثقافتی تعاون کو سراہا جبکہ روسی وزارتِ خارجہ کی ترجمان ماریہ زخارووا اور ماسکو میں تعینات پاکستانی سفیر فیصل نیاز ترمذی نے اس عالمی پلیٹ فارم پر پاکستان کی کامیاب نمائندگی پر مسرت کا اظہار کیا۔