ورلڈ کلچر فیسٹیول میں ہر ثقافت موجود، آرٹس کونسل کراچی گلدستہ بن گیا: آئی جی سندھ

آرٹس کونسل آف پاکستان کراچی کے زیر اہتمام جاری تیسرے ورلڈ کلچر فیسٹیول کی ثقافتی سرگرمیاں عروج پر ہیں، جہاں انسپکٹر جنرل (آئی جی) سندھ پولیس جاوید عالم اوڈھو نے آرٹس کونسل کا دورہ کر کے فیسٹیول کے انتظامات اور مختلف سرگرمیوں کا جائزہ لیا۔ اس موقع پر آئی جی سندھ نے بلوچستان کے مختلف علاقوں سے فیسٹیول میں شرکت کے لیے آئے ہوئے بچوں اور نوجوانوں سے بھی ملاقات کی اور کہا کہ وہ آرٹس کونسل کراچی کی خدمات کے مداح ہیں کیونکہ صدر آرٹس کونسل احمد شاہ کی یہ بڑی خوبی ہے کہ وہ ثقافت کے ذریعے پورے پاکستان کو متحد کرتے ہیں۔ جاوید عالم اوڈھو نے مزید کہا کہ یہ امر خوش آئند ہے کہ دنیا بھر کے فنکار آج کراچی میں موجود ہیں اور آرٹس کونسل ایک ایسا گلدستہ بن چکا ہے جہاں ہر ثقافت کی جھلک نمایاں ہے، جبکہ فیسٹیول میں شریک تمام غیر ملکی مہمانوں کی سیکیورٹی کا ہر طرح سے خصوصی خیال رکھا جا رہا ہے۔