ٹرمپ کی پھر فیلڈ مارشل اور وزیراعظم کی تعریف، پاک بھارت جنگ رکوانے کا تذکرہ

امریکی صدر ڈونلڈ ٹرمپ نے وزیر دفاع پیٹ ہیگستھ اور نیول چیف کے ہمراہ میڈیا سے گفتگو میں کہا کہ امریکی فوج دنیا کی بہترین فورس ہے اور بحریہ کو مزید مضبوط بنایا جا رہا ہے۔ انہوں نے بتایا کہ امریکی بحریہ میں طاقتور ترین طیارہ بردار جہاز شامل کیا جا رہا ہے اور شراکت داروں کے ساتھ مل کر امریکی تاریخ کا سب سے بڑا بحری جنگی جہاز تیار کیا جا رہا ہے۔

صدر ٹرمپ کے مطابق نئے بحری جہاز میں جدید گنز، ہائپر سونک میزائل اور لیزر سسٹم شامل ہوں گے، جبکہ امریکا کو نئے بحری جہازوں اور آبدوزوں کی اشد ضرورت تھی۔ انہوں نے کہا کہ امریکا آبدوز سازی میں دیگر ممالک سے پندرہ سال آگے ہے اور چین یا روس بھی اس شعبے میں امریکا کا مقابلہ نہیں کر سکتے۔

انہوں نے منشیات کی سمگلنگ کے خلاف کارروائیوں کا ذکر کرتے ہوئے کہا کہ سمندر میں منشیات سے بھری کشتیوں کو تباہ کیا جا رہا ہے، جس سے کیریبین کے راستے منشیات کی سمگلنگ میں 96.2 فیصد کمی آئی ہے۔

صدر ٹرمپ نے جیفری ایبسٹین سے متعلق فائلز پر افسوس کا اظہار کرتے ہوئے کہا کہ انہوں نے کبھی ایبسٹین کے جزیرے کا دورہ نہیں کیا۔ آخر میں ان کا کہنا تھا کہ انہوں نے پاکستان اور بھارت کے درمیان ایٹمی جنگ رکوائی، جس سے دس لاکھ جانیں بچیں، اور وہ اب تک دنیا میں آٹھ جنگیں رکوا چکے ہیں۔