وہاج علی کے سر پر شہرت سوار نہیں ہوئی، آج بھی پہلے جیسے عاجز ہیں: امر خان

پاکستانی شوبز انڈسٹری کی معروف اور باصلاحیت اداکارہ امر خان نے کہا ہے کہ ساتھی اداکار وہاج علی کے سر پر شہرت کبھی سوار نہیں ہوئی اور وہ اتنی بڑی کامیابی کے باوجود آج بھی پہلے جیسے عاجز اور زمین سے جڑے ہوئے انسان ہیں۔

اداکارہ امر خان اور وہاج علی کی جوڑی کو حال ہی میں ایک نجی ٹی وی کے ڈرامہ سیریل میں ناظرین کی جانب سے بے حد پسند کیا جا رہا ہے، جبکہ اس ڈرامے میں نامور اداکارہ ماہرہ خان بھی مرکزی کردار نبھا رہی ہیں۔ حال ہی میں ایک پوڈ کاسٹ میں شرکت کے دوران امر خان نے شوبز اور اپنے حالیہ پراجیکٹ سمیت مختلف موضوعات پر کھل کر اظہارِ خیال کیا۔

پوڈ کاسٹ کے دوران گفتگو کرتے ہوئے امر خان نے بتایا کہ اگرچہ ان کے خیال میں اس مخصوص کردار کو کئی دیگر مرد اداکار بھی ادا کر سکتے تھے اور وہ جانتی ہیں کہ انڈسٹری کے بہت سے اداکار ایسے شاندار کردار نبھانے کے خواہشمند بھی تھے، لیکن جس خوبصورتی اور مہارت کے ساتھ اسے وہاج علی نے پرفارم کیا ہے، ویسا کوئی دوسرا اداکار نہیں کر سکتا تھا۔

اداکارہ نے ایک انسان کے طور پر بھی وہاج علی کی بھرپور تعریف کی اور انکشاف کیا کہ وہ وہاج کو اس دور سے جانتی ہیں جب وہ دونوں ہی شوبز کی دنیا میں بالکل نئے اور سٹرگل کر رہے تھے۔ امر خان کا کہنا تھا کہ گزشتہ چند برسوں میں وہاج علی نے بے پناہ مقبولیت اور شہرت حاصل کی ہے، لیکن اس کے باوجود ان کے رویے اور اندازِ گفتگو میں کوئی تبدیلی نہیں آئی۔ انہوں نے مزید کہا کہ وہاج کو ملنے والی بڑی کامیابیوں نے انہیں ذرا بھی متغیر نہیں کیا اور اسی طرح انہوں نے کیریئر کے دوران ناکامیوں کو بھی کبھی اپنے دل پر نہیں لیا، بلکہ وہ آج بھی اتنے ہی عاجز اور خلیق انسان ہیں۔