خاتون اینکر ربیعہ احسن کے قتل کیس کی تحقیقات میں اہم پیش رفت

خاتون اینکر ربیعہ احسن کے قتل کے ہائی پروفائل کیس کی تحقیقات میں اہم پیش رفت سامنے آئی ہے۔

تفتیشی ذرائع کے مطابق مقتولہ ربیعہ احسن کے زیرِ استعمال دونوں موبائل فونز کا ابتدائی تجزیہ مکمل کر لیا گیا ہے۔ ذرائع نے بتایا کہ دونوں فونز پر کسی قسم کا پاس ورڈ یا سیکورٹی لاک موجود نہیں تھا، جس کی وجہ سے تفتیشی حکام کو ڈیٹا تک رسائی حاصل کرنے میں کوئی دشواری پیش نہیں آئی۔

پولیس نے ربیعہ احسن اور ان کے شوہر کے درمیان ہونے والی تمام واٹس ایپ اور موبائل چیٹ کا باریک بینی سے جائزہ لیا، تاہم ابتدائی تجزیے کے دوران میاں بیوی کے درمیان کسی قسم کے تنازع، تلخی یا سنگین اختلافات کا کوئی ثبوت سامنے نہیں آیا ہے۔ تفتیشی حکام کے مطابق ربیعہ احسن کے دونوں فونز اور ان کے شوہر کے موبائل فون کی حتمی فرانزک رپورٹ مکمل ہونے کے بعد اسے پولیس چالان میں شامل کیا جائے گا، جس سے کیس کی قانونی سمت کا حتمی تعین ہو سکے گا۔