خاتون صحافی ربیعہ احسن قتل کیس، ملزم کا ڈی این اے ٹیسٹ مکمل

خاتون صحافی ربیعہ احسن قتل کیس کی تحقیقات میں اہم پیش رفت ہوئی ہے جہاں گرفتار ملزم احسن کا لاہور میں ڈی این اے (DNA) ٹیسٹ مکمل کر لیا گیا ہے۔

تفتیشی ذرائع کے مطابق پولیس نے ملزم کے پولی گرافک (جھوٹ پکڑنے کے) ٹیسٹ کے لیے پنجاب فرانزک سائنس لیبارٹری (PFSA) میں باضابطہ مراسلہ جمع کرا دیا ہے، جبکہ جائے وقوعہ اور قتل سے منسلک 7 اہم شواہد کے پارسل بھی تجزیے کے لیے لیبارٹری کے حوالے کر دیے گئے ہیں۔

ذرائع نے مزید بتایا کہ مقتولہ ربیعہ احسن اور ملزم کے زیرِ استعمال 4 موبائل فونز بھی فرانزک سائنس لیبارٹری میں جمع کرا دیے گئے ہیں، جن کا مکمل فرانزک تجزیہ کر کے ڈیٹا اور پیغامات کا ٹرانسکرپٹ تیار کیا جائے گا۔ تفتیشی حکام کے مطابق پولی گرافک ٹیسٹ کا مرحلہ مکمل ہونے کے بعد ملزم احسن کو آج ہی لاہور سے واپس راولپنڈی منتقل کر دیا جائے گا۔