صوابی میں فائرنگ سے چوکی انچارج سمیت 2 اہلکار شہید، ڈی آئی خان میں بھی تھانے پر حملہ

صوابی میں نامعلوم شرپسندوں کی پولیس پر فائرنگ کے نتیجے میں چوکی انچارج سمیت 2 اہلکار شہید ہوگئے، جبکہ ڈیرہ اسماعیل خان میں بھی دہشت گردوں نے بارود سے بھری گاڑی تھانے کے مین گیٹ سے ٹکرا دی۔

ڈسٹرکٹ پولیس آفیسر (ڈی پی او) صوابی وقاص رفیق کے مطابق گزشتہ رات پولیس چوکی منصوری کی حدود میں نامعلوم مسلح شرپسندوں نے پولیس پارٹی پر فائرنگ کر دی، جس کے نتیجے میں چوکی انچارج ولید خان سمیت دو پولیس اہلکار جامِ شہادت نوش کر گئے جبکہ ایک اہلکار زخمی ہوگیا۔ ڈی پی او نے بتایا کہ شہدا کی میتوں اور زخمی اہلکار کو فوری طور پر باچا خان میڈیکل کمپلیکس منتقل کر دیا گیا ہے، جبکہ پولیس نے ملزمان کی گرفتاری کے لیے علاقے کو گھیرے میں لے کر گرینڈ سرچ آپریشن شروع کر دیا ہے۔

دوسری جانب ڈی آئی خان میں دہشت گردوں نے ایک اور بزدلانہ کارروائی کرتے ہوئے بارود سے بھری گاڑی تھانہ بندکوائی کے مین گیٹ سے ٹکرا دی۔ پولیس حکام کے مطابق اس زوردار دھماکے کے نتیجے میں تھانے کا مین گیٹ اور بیرونی دیوار مکمل طور پر تباہ ہوگئی، تاہم خوش قسمتی سے کوئی جانی نقصان نہیں ہوا۔ واقعے کے بعد پولیس کی جوابی نفری کے بروقت پہنچنے پر دہشت گرد پسپا ہو کر فرار ہونے پر مجبور ہوگئے۔