سائبیریا کے 2800 سال قدیم مقبرے سے بھنگ کے ایک ہزار بیج دریافت

جنوبی سائبیریا کی جمہوریہ تووا میں سکیتھیائی تہذیب سے تعلق رکھنے والے تقریباً 2800 سال قدیم ایک مقبرے سے بھنگ کے ایک ہزار سے زائد بیج دریافت ہوئے ہیں۔ ڈاکٹر جینو کاسپاری کی قیادت میں تحقیق کرنے والی بین الاقوامی ٹیم نے دریافت شدہ بیجوں کی ریڈیو کاربن ڈیٹنگ کے بعد تصدیق کی ہے کہ یہ بیج آٹھویں صدی قبل مسیح کے اوائل میں مقبرے میں رکھے گئے تھے۔ ماہرینِ آثارِ قدیمہ کے مطابق یہ دریافت قدیم زمانے میں بھنگ کے نشہ آور استعمال کا اب تک کا سب سے قدیم اور براہِ راست آثارِ قدیمہ کا ثبوت قرار دی جا رہی ہے۔ تحقیق کے دوران بیجوں کے ساتھ انسانی بالوں کے کیمیائی تجزیے سے معلوم ہوا ہے کہ قدیم انسان بھنگ کو تدفینی و مذہبی رسومات اور نشے کے مقاصد کے لیے استعمال کرتے تھے۔ ماہرین کا ماننا ہے کہ اس اہم پیشرفت سے ہزاروں سال قبل انسانی معاشرت اور تدفینی تاریخ کو سمجھنے میں مدد ملے گی۔