ملکی معاشی ترقی کیلئے ڈسٹرکٹ اور سیکٹرل اکانومی پر توجہ ہے: ایس ایم تنویر

سربراہ یونائیٹڈ بزنس گروپ (یو بی جی) ایس ایم تنویر نے کہا ہے کہ ملک کی معاشی ترقی کے لیے ڈسٹرکٹ اور سیکٹرل اکانومی پر خصوصی توجہ دی جا رہی ہے۔ پشاور میں تاجر برادری کی تقریب سے خطاب کرتے ہوئے انہوں نے اعلان کیا کہ تمام متعلقہ ممبران کو پہلے 100 دن کا روڈ میپ پیش کرنا ہوگا، جبکہ ہر تین ماہ بعد ان کی کارکردگی کی باقاعدہ مانیٹرنگ کی جائے گی۔ ایس ایم تنویر کا کہنا تھا کہ گزشتہ تین سال سے جاری کشیدگی کی وجہ سے خیبر پختونخوا کی معیشت کو شدید نقصان پہنچا، تاہم اب امن و امان کی صورتِ حال میں بہتری آئی ہے۔ انہوں نے واضح کیا کہ فیڈریشن میں کوئی غیر ضروری کمیٹی تشکیل نہیں دی جائے گی اور معیشت کی بہتری کے لیے تمام ممبران کو اپنے اپنے چیمبرز کی سطح پر بھرپور وقت دینا ہوگا۔