تاجر برادری کے مطالبے پر جنوری میں مزید مال گاڑیاں چلائیں گے: وزیر ریلوے

وفاقی وزیر ریلوے حنیف عباسی کی زیرِ صدارت انعقاد پذیر اجلاس میں ریلوے کے فریٹ آپریشن کو وسعت دینے اور آمدن میں اضافے کے لیے اہم فیصلوں کی منظوری دی گئی ہے۔ اجلاس میں تاجر برادری کے مطالبے پر جنوری تک 14 نئی مال گاڑیاں چلانے اور فریٹ آمدن بڑھانے کے لیے خانیوال میں ڈرائی پورٹ قائم کرنے کا فیصلہ کیا گیا، جبکہ اوور لوڈنگ کی روک تھام کے لیے 31 دسمبر تک ملک بھر میں 5 نئے وے برج نصب کیے جائیں گے۔ وفاقی وزیر نے اعلان کیا کہ مکینیکل وجوہات سے پیش آنے والے حادثات کی تحقیقات ایف آئی اے (FIA) سے کروائی جائیں گی اور متعلقہ ٹرین ایگزامینرز کے خلاف انکوائری ہوگی۔ اس کے علاوہ سلیپر فیکٹریوں کو ڈبل شفٹ میں چلانے، ہیڈکوارٹرز اجلاس کے بجائے ڈویژنل سطح پر میٹنگز کرنے اور ڈی وی ایم و ڈی وی ایس کوچز کو مرحلہ وار ختم کرنے کا فیصلہ بھی کیا گیا۔ بعد ازاں حنیف عباسی نے سینئر وزیر پنجاب مریم اورنگزیب سے ملاقات کی جس میں صوبے میں برانچ لائنوں کی بحالی کے لیے فوری فنڈز کے اجرا کی یقین دہانی کرائی گئی۔