ایمان مزاری اور ہادی علی چٹھہ نے سزا کے خلاف اپیلیں دائر کردیں

ایڈووکیٹ ایمان مزاری اور ہادی علی چٹھہ نے بیرئیر ہٹانے کے مقدمے میں انسدادِ دہشت گردی عدالت کی جانب سے سنائی گئی 10، 10 سال قید کی سزا کے خلاف اسلام آباد ہائیکورٹ میں اپیلیں دائر کر دی ہیں۔ وکیل فیصل صدیقی، ریاست علی آزاد اور زینب جنجوعہ کی وساطت سے دائر اپیلوں میں سزا کی معطلی اور ضمانت پر رہائی کی متفرق درخواستیں بھی شامل کی گئی ہیں۔ اپیلوں میں موقف اختیار کیا گیا ہے کہ ٹرائل کورٹ نے آئین کے آرٹیکل 10 کے تحت فیئر ٹرائل کے تقاضے پورے نہیں کیے اور جیل ٹرائل کو ایک خفیہ کارروائی کی طرح چلایا گیا۔ درخواست گزاروں نے عدالتِ عالیہ سے استدعا کی ہے کہ عدالتی نظیروں کی روشنی میں ٹرائل کورٹ کی جانب سے دی گئی سزا کو کالعدم قرار دیا جائے اور اپیلوں پر فیصلہ ہونے تک سزا معطل کر کے دونوں کو ضمانت پر رہا کیا جائے۔