پاکستان کا بیرونی قرض ایک دہائی میں دوگنا ہو کر 135.1 ارب ڈالر تک پہنچ گیا، چین سب سے بڑا قرض دہندہ

ورلڈ بینک کی تازہ ترین رپورٹ کے مطابق گزشتہ ایک دہائی (2015 تا 2025) کے دوران پاکستان کے مجموعی بیرونی قرضوں میں تقریباً دوگنا اضافہ ہوا ہے، جس کے بعد قرضوں کا حجم 68.67 ارب ڈالر سے بڑھ کر 135.107 ارب ڈالر کی سطح پر پہنچ گیا ہے۔ رپورٹ کے مطابق کل رقم میں سے 107.07 ارب ڈالر سرکاری و حکومتی ضمانتوں، 17.58 ارب ڈالر نجی شعبے کے غیر ضمانتی اور 10.45 ارب ڈالر قلیل مدتی قرضوں پر مشتمل ہیں۔ مالیاتی اداروں میں کثیرالجہتی اداروں کے 56.83 ارب ڈالر جبکہ دوطرفہ قرضوں کا حجم 42.43 ارب ڈالر ہے، جس میں چین 22.4 ارب ڈالر کے ساتھ پاکستان کا سب سے بڑا انفرادی قرض دہندہ ہے جبکہ ورلڈ بینک (19.2 ارب ڈالر) اور ایشیائی ترقیاتی بینک (16.83 ارب ڈالر) بالترتیب دوسرے اور تیسرے نمبر پر ہیں۔ مزید برآں، آئی ایم ایف نے اپنے مختلف پروگراموں کے تحت 2025 میں پاکستان کو 2.3 ارب ڈالر جاری کیے جبکہ چین نے بھی 2 ارب ڈالر کے قرض کی مدت میں توسیع کی۔