وزیراعظم نے برآمدات بڑھانے کیلئے ٹی ڈی اے پی کو جدید بنانے کی منظوری دے دی

وزیراعظم محمد شہباز شریف نے پاکستانی مصنوعات کی عالمی منڈیوں تک رسائی، برآمدات میں اضافے اور چھوٹے و درمیانے درجے کے کاروبار (SMEs) کو عالمی معیار کے مطابق ڈھالنے کے لیے ٹریڈ ڈویلپمنٹ اتھارٹی آف پاکستان (TDAP) کو جدید خطوط پر استوار کرنے کی منظوری دے دی ہے۔ اسلام آباد میں ادارے کی اصلاحات سے متعلق اعلیٰ سطح اجلاس کی صدارت کرتے ہوئے وزیراعظم نے ہدایت کی کہ زرعی اور صنعتی مصنوعات کی مکمل ویلیو چین تیار کی جائے اور ادارے کے پرفارمنس و فنانشل آڈٹ کے لیے نامور نجی فرمز کی خدمات لی جائیں۔ 12 ماہ پر محیط اس اصلاحاتی منصوبے میں ڈیجیٹل پلیٹ فارمز اور مصنوعی ذہانت (AI) کے استعمال سمیت بورڈ و انتظامی ڈھانچے کی تنظیمِ نو شامل ہے، جس کا اطلاق اگلے برس کے وسط تک مکمل کرنے کی ہدایت کی گئی ہے۔ اجلاس میں وفاقی وزراء محمد اورنگزیب، جام کمال خان اور رانا تنویر حسین سمیت اعلیٰ حکام نے شرکت کی۔