سپریم کورٹ نے ملزم کی ضمانت منسوخ کرنے کیلئے 8 اصول طے کر دیئے

سپریم کورٹ آف پاکستان نے ملزم کی ضمانت منسوخ کرنے کے 8 اہم قانون اصول طے کر دیے ہیں، جن کے تحت اگر ضمانت کا حکم بادی النظر میں غیر قانونی یا ناانصافی پر مبنی ہو تو اسے منسوخ کیا جا سکتا ہے۔ جسٹس محمد علی مظہر کے تحریر کردہ فیصلے کے مطابق ملزم کی جانب سے ضمانت کی رعایت کا ناجائز استعمال، گواہوں یا شواہد پر اثر انداز ہونے کی کوشش، فرار ہونے کا خدشہ، دوبارہ اسی نوعیت کے جرم کا ارتکاب یا تفتیش کے دوران نئے حقائق کا سامنے آنا ضمانت منسوخی کی بنیادی وجوہات بن سکتے ہیں۔ عدالتِ عظمیٰ نے لاڑکانہ میں غیر قانونی بجلی کی فراہمی کے دوران تار ٹوٹنے سے شہری نور حسین کی ہلاکت سے متعلق کیس میں سندھ ہائیکورٹ کا ملزم علی اصغر کھوکھر کی ضمانت کا فیصلہ برقرار رکھا اور ایف آئی آر کے اندراج میں 9 ماہ کی تاخیر کو مزید تحقیق کا تقاضا قرار دیا۔ سپریم کورٹ نے فیصلے کی نقل چیئرمین واپڈا کو بھی ارسال کرنے کی ہدایت کی ہے تاکہ بجلی کی غیر قانونی فراہمی اور چوری میں ملوث افراد کے خلاف متعلقہ یوٹیلیٹی کمپنیوں کے ذریعے جائزہ لیا جا سکے۔