پاکستان اور روس کے درمیان بدعنوانی اور منی لانڈرنگ کیخلاف اہم معاہدہ

پاکستان اور روس نے بدعنوانی، منی لانڈرنگ اور غیر قانونی طریقوں سے حاصل کردہ اثاثوں کی نشاندہی و واپسی کے خلاف ادارہ جاتی تعاون کو مضبوط بنانے کے لیے ایک اہم مفاہمتی یادداشت (MoU) پر دستخط کر دیے ہیں۔ ماسکو میں قومی احتساب بیورو (نیب) کے چیئرمین لیفٹیننٹ جنرل (ر) نذیر احمد اور روسی پراسیکیوٹر جنرل الیگزینڈر گوتسان نے اس معاہدے پر دستخط کیے۔ معاہدے کے تحت دونوں ممالک مالی جرائم کے خاتمے، باہمی قانونی معاونت، تجربات و معلومات کے تبادلے اور افسران کی پیشہ ورانہ تربیت کے لیے مشترکہ فریم ورک کے تحت کام کریں گے۔ روسی پراسیکیوٹر جنرل نے اس موقع پر گفتگو کرتے ہوئے کہا کہ بدعنوانی کا خاتمہ پائیدار معاشی ترقی اور سرمایہ کاری کے لیے انتہائی ضروری ہے، جبکہ نیب کے مطابق یہ پیش رفت دونوں ممالک کے درمیان قانون کی حکمرانی، شفافیت اور احتساب کو فروغ دینے میں سنگِ میل ثابت ہوگی۔